捉姦在床

囡囡,枉媽咪平時咁錫您,您竟然向嗲地投懷送抱......

真的要病嗎...

每次病之前,身體都總會響起警號提醒我要早睡早起,要小心飲食!但係唔知點解,知道越唔可以做既,就越想做;越唔可以食既就越想食;真係好莫明奇妙!
上星期尾開始,敵人已經嘗試侵襲,警號一次又一次響過,但係...我仍然好似d昏君咁,吃喝玩樂,疏於防範,敵人一步步迫近...我而家處身於水深火熱之中...我現在願意說一句"對不起",請你們撤軍吧!!!

終於買到啦...

由上年開始就想買部water fountain俾豬豬們,等佢地似多d水,健康dd......但心大又 心細,想買呢部,又想買個部......最後經過一輪開會討論,終於買左drinkwell~貪佢有條水柱,吸引力大d!

新屎坑,個個反應都唔同,moremore第一個試新野,佢飲到lamlam利;之後到囡囡,佢初初有d好驚,地毯式核實對方身份之後先飲,好斯文;至於pinkpink,完全想像到佢係未接受呢個外敵;冬豬就覺得佢只不過係一件怪物,飲唔飲都罷......
希望有左呢部水機,真係豬豬們更加健康啦!!!
另外,真係要千萬個唔該俾比奧媽,為左慳入場費,全靠佢幫我帶番黎鄉下俾我......謝謝!!

喵友聚會

上星期六(1/6),天氣寒冷,乾燥...我同阿毛參加左一個喵喵party,去左大埔一間村屋探喵界大王~黑頭同佢既王弟~黑頭次郎......好開心,個日又有得玩,又有得食,仲有喵棒呀...
黑頭大王受萬人敬仰,而次郎既外表雖然唔係人人能夠接受,但一旦接觸過,必定歎一句"愛得太遲",性格超好,冬天抱住佢又暖笠笠,簡直"正"...
個日隨左有喵玩,又bbq,最正緊係親身體驗wii既魅力,簡直一試上癮,好好玩,成為我地既新target......

結婚週年紀念日

今日係我地結婚週年紀念日,都係冇特別,因為阿毛要返工...但阿毛都book左DAN RYAN'S~我地都愛既American food,不過,我地始終覺得呢d係應該一班人去先好,樣樣都想食,又好qq大碟,我地只係叫左個Appetizer Combo加個Pasta都已經勁飽,姐姐仲推介一個Mud Pie~Oreo餅底+三層雪糕(超甜,下次千萬唔可以再叫),簡直又飽又膩!下次一定要一班人再食過,仲未食到羊架,肉眼扒,墨西哥脆片......
其實年年都冇咩特別,最搞笑係會每年都問那年這個時候在做什麼,差唔多每兩個鐘就reveiw一次...哈哈...今年最脹爆,所以感覺最好笑,想像用而家既身型去march-in...簡直想撻底!
回顧一下,發覺我地自結婚後,今年既感情最好,原因應該係多左moremore同pinkpink,加埋冬豬同囡囡,好開心,好熱鬧...其實屋企熱鬧d,真係會開心d架,再加上今年好似發生左好多事;所以我同阿毛既感情簡直大躍進!
希望新一年再開心d,再熱鬧d,我地唔貪心,多一隻喵,多一個b,咁就足夠啦......

Happy New Year 2007

Happy New Year!
祝大家心想事成...身體健康...事事順利!
又希望世界和平!!!

2006的最後貓展

又到貓展,pinkpink今次的成績都不俗,
7th Best Cat in Premiership in Ring 3
6th Best Cat in Premiership in Ring 4
總的來說,成績比上次好...好叻,好乖,真抵錫!
但係,今次既貓展係超悶,節奏慢,人流極少......由開始到結尾都好似一湖淡水,毫無味道!
我同pinkpink都超支力,好似擔完泥一樣,一返屋企就好開心,冬豬同moremore錫番之後,就小睡...之後就食食食,又屙屙屙,又食食食...

真係陰公豬...
嗲o地媽咪錫番您!

Boxing Day

今年平安夜無鎖事事,咁就去左買聖誕禮物俾豬豬們...
本來只係買左一個喵草蘋果,佢地已經玩得好開心...點知原來佢地鍾意阿毛個份多d,呢兩日,大家玩到癲晒,仲未覺得悶...呢份禮物簡直超抵...哈哈...
(個相機又借左俾dad&mom,唔知點解個電話影出黎會打格仔,唔通兒童不宜...)

Merry X'mas

今年聖誕節有四隻豬豬,暖意洋溢,好溫暖,好幸福!希望大家都同我地一樣開開心心過聖誕...
Merry Christmas!

冬至

今年冬至好特別,爸爸媽咪去左旅行,阿毛又返左工,我諗係我咁大個女以來,第一次得自己一個人在冬至吃晚餐...有一種淒冷既感覺! 所以,我好豪咁叫左KFC外賣,要六十五個大洋,差d飽屎...哈哈!!!

爸爸生日

因為過兩日,爸爸同媽咪會過美國;所以,今日提早慶祝!
我地一行六人,爸爸,媽咪,阿哥,馨女姨,皓兒表妹同我(最唔完美就係阿毛要返工)去左海運個間STONEGRILL...爸爸第一次去個度食,覺得好新鮮,好好味,佢好開心!
其實,佢有好幾年冇去海運附近,今日再去,已經有好多改變啦...以前,我同阿哥都好幸福,每逢WEEKEND,爸爸同媽咪都會帶我地周圍去,踩單車,游水,公園...例必有活動...最常去就係尖沙咀東部,好記得年年聖誕節都一定去睇燈飾,好開心架!
今日在同一地方講舊事,覺得自己好幸福,好開心,好感動...佢地對我地既愛都無變過...
如果,將來我個女都好似我咁孝順就好啦...哈哈!

最衰唔記得帶相機,只可以用手機影...

好感動!

期待以久的一刻,今早終於看見了...感動到想喊!

心痛

我的心痛極了! 我禽晚竟然漏左個電話係的士...我從來都算謹慎,對於銀包,電話都放得好好...只有我話阿毛成日亂放...成日俾我話...我今次真係老貓燒鬚! 最心痛係平時幫豬豬們影既相都無左...仲有SMS,我平時最鍾意久唔久就睇番,而家咩都冇...好可憐!

我諗起就覺得d人好衰,好貪心...其實個電話值得幾多錢,佢地唔諗下如果係自己,都想人地俾番佢架嘛...之前阿毛都試漏左電話係的士,當我地又唔開心左一晚之後,點知,第二朝早,個司機竟然叫佢個女送番黎九龍灣俾我地,呢d行為簡直完全正確呀!

其實,我都試過執到人地個銀包,裡面又有錢,但係我真係冇諗過貪,我跟番入面d咭既資料送番俾個失主,其實,當你諗到人地唔見左野既心情,仲點會貪得落手架...路不拾遺...我知而家香港好少人做得到...真係應該好好反省一下......

Chloe & Raymond's wedding

今日係Chloe同Raymond既大婚之喜...好開心!又一對朋友結婚...
其實未來一年已知會結婚既朋友已經有五對couple...好開心,但開心之餘,其實又意味住我開始老,身邊既朋友要成家立室...我地再聚首一堂既時候,話題都可能唔同了...
但願一年後,話題由籌備婚禮轉到生兒育女...未來既gathering會更加熱鬧!!!
在此亦祝福Chloe同Raymond能夠執子之手,與子偕老!

今天的午餐

今日又在家裡吃午餐...阿毛返完夜,訓緊覺覺豬,我自己一個人食,食咩好呢......
哈哈...終於俾我諗到,雪櫃有四隻大閘蟹...嘻嘻...我的午餐是兩隻大閘蟹...好美味,一個字:正!

pinkpink今日洗白白...

天氣涼了...

冬天終於來了...一年比一年遲,唔知會唔會以後都冇冬天呢...
囡囡同冬豬,moremore,pinkpink都開始全天侯覺覺豬啦...今年唔知會唔會大家攬住一齊訓呢...好期待!

鏞記皮旦

之前成日聽d貓友講鏞記皮旦好出色,禽日去覆診經過,終於可以買番屋企試下......嘩......果然好好味,我食左三份一隻,我本身已經好鍾意食,所以覺得超級好味...連阿毛唔食皮旦都話正!下次去要開夠一打呀!

生命可貴

冥冥中主宰既究竟係咩呢???
呢個故事令我覺得人生有太多事係唔能夠把握,大家真係要好好珍惜而家擁有既一切...
http://www.speech.com.hk/kolamlam/index.htm (轉載自Baby Kingdom)

我覺得世界就係咁奇妙,想得到既人就算千方百計都得唔到,唔想得到既人就千方百計都避唔到...

報夢

唔知係咪真係有報夢呢樣野,話說我婆婆都死左十幾年,以前逢過時過節都有上山拜公公婆婆...
但呢兩年好懶,都係媽咪做代表,我同阿毛都好少出席...
星期一臨起身發左個夢,婆婆訓係棺材入面同我講左幾句,真係好耐冇咁真實咁見過佢...咁平時發完夢就算架啦...唔知點解個日媽咪又打電話俾我,我又無端端同佢講呢件事...
點知佢話我知過兩日(即係今日)係婆婆死忌,可能佢太耐冇見我,掛住我喎...叫我去拜下佢...
所以,今朝一早,等埋阿毛收工就一齊入左沙田!

我成日都以為自己已經好珍惜屋企人,做得好好...其實,原來未夠好...仲要驚動婆婆黎提點我...

怪叫

我記得大約一個月前,冬豬就鍾意左一個好耐之前買既灰色毛毛球...
唔知點解,佢成日咬住個毛毛球行黎行去,呢排嚴重左...一路咬住一路叫...大家可以想像下,佢將個毛毛球塞住自己個口,再喵喵叫,把聲係幾咁低沉,再加上呢排天色昏暗,簡直為間屋企增添左幾分恐怖...簡直令人個心唔舒服呀!!!
呢個星期阿毛又返夜,每次冬豬一叫,我就想打暈佢...

影相相...

今日,又約左Raymond幫豬豬們影相,moremore全程好似一個top model咁......總括三百幾張相,有一半以上都係呢位大小姐既...
好感激Raymond身水身汗幫手影得靚靚...

好難得影到既全體相,都叫齊齊整整...

Raymond話moremore似一隻狗多d...

moremore影呢張相,來回行左好多次,好似行catwalk咁...

冬豬同pinkpink幾sweet...一個心型...

pinkpink呢個樣好得意...



影完相,我仲可以去大榮華食好好味既馬拉糕...(不過我覺得呢間大榮華水準比較參差,好似上次既軟殼蟹好味,今次就唔好味...上次既燒腩仔唔好味,今次就好好味...)

大閘蟹

今晚終於食到今年第一隻大閘蟹,足足食左三隻,好滿足,好開心!
雖然大家都話上星期個d好味d,羔多d,但今晚都已經好滿足啦!
不過,唔知係咪食得太快,而家好胃痛...但我仍然會再接再厲,起碼都要食多一次...yummy!

臭臭臭...

今日本來應該好FREE架嘛...見頭尺尺,諗住訓下覺啦...點知蠢蠢地既pinkpink又一傑作,佢又屙到成個patpat濕晒!
我真係頂佢唔順,勁臭! 唯一辦法就係沖涼,上星期六先沖完一次,又沖......
全屋係pinkpink同moremore至臭,成日屙尿屙到patpat濕晒,就黎俾我剪晒佢兩個d毛架啦!!!

Angie結婚了!

昨天,我的好友~Anige結婚了! 我覺得好開心!
希望你們二人能夠珍惜對方,
百年好合,永結同心!

PinkPink變了!

想當初第一眼見到Pinky,就覺得佢又蠢又怕事...硬覺得佢一副楚楚可憐樣,好想保護佢...但係,永遠都唔會可以埋到身,只要接近佢三尺範圍,必走...總之,生物就不可接近...
經過呢三個多月,她變了!PinkPink變得開放,旁若無人,視無忌憚,行埋身邊已經唔會彈開,就算有喵圍觀,都依然玩得豪放...

我家有七小豬

因為小桂伉儷知道我好掛住多多,所以帶左多多同兩個隨從去我家小住...而家屋企有七隻豬豬...好熱鬧,好開心呀!!!

多多依然好似一個細路女咁,八八卦卦,成日都週屋走,間中走埋身邊喵兩聲,真係sweet到暈呀...


油油又係無變過,細膽到震,驚驚青青,見喵就"fei",好變態,但係好黐人,勁嗲...


Leo無論去到邊都我行我素,好有性格,完全唔會受環境影響,一切照舊...


冬豬對於好朋友到訪,簡直照顧周到,頭一晚就俾Welcome pat pat kiss,之後就梗係覺覺豬為上...


Drop豬比起之前好好多,唔會驚,就係一於少理,喵不犯我,我不犯喵,媽咪錫晒...


MoreMore出名八卦,逢pat必追,鍥而不捨,逢糧必食,絕不蝕底...


PinkPink平時好少理閒事,覺豬至上,但今次出奇相反,週圍巡視,驚外敵入侵,一見外敵就以怪叫擊退,不過,無喵理佢...


哈哈...七小豬真係好過癮,好盞鬼,尤其當大家一齊玩緊,突然間有人"叮噹",見住佢地四散,好攪笑...
今日仲同冬,Drop,More洗白白,好鬼支力!

無聊之作

每逢星期日都係最無聊既日子...豬豬們訓得特別sweet.....
moremore越黎越懶,遲早變大肥豬...










囡囡永遠都係訓覺至上...




冬豬訓覺既招牌甫士...









pinkpink話要上床搵個靚位訓...








阿毛淪落到要訓梳化...

冬豬的生日

今日是冬豬的15歲大壽,爸爸,媽咪都一齊同冬豬慶祝!
冬豬好鍾意個生日蛋糕,仲幫我地試味,原來冬豬鍾意mango......

唔經唔覺,同冬豬相處了13年有多啦! 冬豬依然心智未成熟,仲覺得自己好後生...
祝冬豬身體健健康康,想個樣,得個樣!(例如:drop豬,moremore,pinkpink,吞拿魚,毛毛球,我地既枕頭...)
Happy Birthday!!!

命中注定

命裡有時終須有,命裡無時莫強求!

我成日覺得呢句說話係用黎諷刺人多於鼓勵人...但結果今日呢句說話在我腦海浮浮沉沉出現過百次...

其實當初做呢個blog,完全因為我想記低豬豬們既大小事,令自己可以回味下,大吉利事都可以有個回憶;
另一個原因就是希望將自己人生既計劃都記低,等將來既仔仔女女可以知道(當然希望係女啦!),感受到我地而家既生活!

人生不如意事真是十常八九,原本想出一篇"期待您",正正就是為了"您"!

但天意弄人,"您"已經走了! 可能我地緣份未到!

雖然"您"曾在我的肚子裡,而只是一粒小豆豆;但我仍然會記得!

希望緣份再來的時候,我們可以真真正正兩心相連,一起走將來的路!

又一個月...

咁快又一個月, 又要同囡囡沖涼......究竟你?幾時先識自己沖涼呀....

中秋節

今年中秋節看似冇咩特別, 天氣又唔係特別涼, 但好似話係呢九年來, 個月球最接近地球, 所以個月亮會特別大, 特別圓! 攪到我都覺得今年既中秋係特別開心! 可惜, 今晚阿毛又要返夜, 唯有自己同四豬嘜舉頭望明月啦!

希望今年每個人既中秋都好似我咁開開心心!