大掃除

今日終於的起心肝幫四小豬洗白白過新年!

經過種種原因,天時地利人和既關係,最終由我呢個偉大既sa媽咪/親切既sa姐姐親自操刀......

佢地今日係有史以來最合作既一次,時間只需四個半鐘,簡直令人安慰,為左讚揚佢地,我俾佢地一人錫我一啖......甜到漏......

仲有三日就過新年啦! 好開心呀!!!希望新一年做咩都心想事成!!!

囡囡冇事啦...

禽日一早就帶囡囡去沙田動物診所,醫生檢查之後,就話要驗血同埋做顯影x-ray,需要留大半日,雖然之前都知道要留低佢一個,但都唔係好想,我走出診所一刻,囡囡突然回頭用憂鬱既眼神問,"媽咪,你做咩唔帶我走呀?"那一刻,簡直心如刀割...
我知道如果過程中,如發現有某位置脤大,都必須要開刀,所以整個下午都唔想收到診所既電話......直至下午四時半都冇收到電話,都已經放心了一大半,再致電診所,他們說可以於六時接囡囡,雖然當時未知結果,但都感覺到囡囡冇事了......
到診所見到囡囡,我又忍唔住喊,囡囡又問,"你係咪低能架,我咁痛都未喊!"
醫生話報告顯示,只係大腸有少許發大,壁膜變薄,係發炎反應,其他都冇問題,又冇見到有任何異物;驗血報告都一切正常......姑娘亦話,囡囡留院期間都冇再嘔...離開診所之前,醫生幫佢打兩支針,囡囡竟然還發惡,破口大罵!!!
雖然囡囡心口既毛被剷去,但依然好靚女,新年都可以靚靚逗利是,歡迎各位uncle,auntie...呵呵呵!!!
其實今次冇事係絕對好事,但都不禁想問下囡囡係咪玩野???仲要玩咁大,嚇餐飽...要嗲地媽咪擔心,又要駛咁多$$$,只係幾日,就用左四千幾個大洋......搞到嗲地媽咪冇$$$派利是...
我已經警告家中所有成員,未來十年內,未經許可都不得生病,違者將被逐出境!!!

最後,囡囡要多謝咁多位uncle同auntie既慰問,好番之後,每人都會獲得囡囡既香吻一個!!!

囡囡,你要快d好番呀!

因為囡囡始終都未能止嘔,醫生要囡囡做顯影x-ray,睇下由食道至腸,邊一part出現問題,如果真係有一part有問題,就要開刀,睇下係咪有塞物;如果暢通無阻就唔駛開刀,呢個情況大多係因為胃/腸潰瘍,咁顯影劑對潰瘍有一定幫助,再食藥打針就冇大問題!
希望聽日照完會冇問題啦!
囡囡,你要叻好d呀!

囡囡病了!

29 Jan
0400 囡囡就開始嘔;起初,我以為佢只係嘔毛咁簡單,但一次又一次咁嘔,我仲白痴到以為佢未嘔得清,於是俾吐毛膏囡囡食;食完吐毛膏,囡囡依然繼續食糧,繼續玩,繼續訓;點知......
1730 又嘔多一次,係一次接一次......
2030 還爛臭臭,我才意識到她病了!
30 Jan
0200-1100 嘔嘔嘔......
1500 一心想帶囡囡去睇煩她死家庭御醫~Dr. Leung,怎料變了一個聞名不如見面既徐大禽獸科醫生,打了一針,沒說什麼病,三種藥丸,就給打發回府...
1700 食左藥,覺覺豬...
1800-2200 嘔嘔嘔......
2230 再食藥....以為可以覺覺豬到天亮...
31 Jan
0200-0800 嘔嘔嘔......
1530 再帶囡囡去睇奧雲...等左三粒鐘......
1845 vet幫佢再打左支止嘔針,診斷最大可能係腸胃炎...
2300 又食藥......
1 Feb
0330-0900 嘔...不過嘔少左...只有三次...
1000 再食藥...
1030 三日以黎都唔食野...終於肯食兩啖i/d...
1100 又要食藥......

整個過程都好陰公,最衰就係我唔能夠當機立斷,睇低左件事既嚴重性;我會引以為鑑......今次見到囡囡咁辛苦,真係好心痛,好肉赤...希望囡囡快d好番啦!!!