倒數一個月

成日都聽人講"十月懷胎",其實我都唔係好明,因為由受精到形成胚胎到變成巨bb,點計都係9個月......正確黎講係280日~40週!!!
而話咁快,阿b係我個肚已經有8個月,足足36週啦!!! 心情由興奮,嫌棄,緊張,到而家既不捨...好似好複雜,都未諗到點形容好!

我記得當初知道有左阿b既時候,係又驚又喜,喜係當然,驚係因為有唔好既經歷...戰戰兢兢咁過左三個月,好似放下心頭大石,開始慢慢輕鬆落黎,開始好好咁去享受...
初期依然係要訓．訓．訓．．．要訓既時間係以前既好幾倍，係不由自主咁訓．．．
到中期,我開始覺得自在,可以呢到去,個度去...周圍四出買阿b用品,周圍搵人食飯,真係好開心...
只係期間有d荷爾蒙失調,為左覆診,覆診而煩躁,幸好呢個感覺好快消失...
直至上個月,唔好彩咁整左一隻天殘腳俾自己,每日都忟忟憎憎,唔可以好似之前咁活動自如,還好就係我有一份堅持,就係食．食．食．．．基本上所有飯局都來者不拒．．．以美食黎填補身體上既創傷！！！
而家隻腳好番啦...但係阿b真係一日比一日長大,我個肚一日比一日脹大,我感覺到自己既輪盡,每一步都好似有d困難,最大影響係我既覺覺豬時間,每一晚要起身向"茅次"致敬既次數係多達三,四次...就好似要開始習慣阿b出世之後既時間,就係冇覺好訓...而我係床上既活動更大影響,每一次既轉身好似要搬石頭咁,有時係搬都搬唔郁,要隔離個大佬代努先可以起到身...再加上面腫,手腫又腳腫,真係想像唔到,之後會變成點樣...

除左以上既問題,令我最最最深刻既係阿b由開始識得彈一下,到彈兩下,彈三下,到而家每日打關斗,跳舞...呢個感覺真係好奇妙,而呢個感覺亦係令我最不捨...

之前既每一日,都希望阿b快快出黎,而家既心情真係開始好矛盾,一方面,好想阿b快d出黎,一來可以快d見到阿b既真身,二來又可以減輕而家既負擔;但係另一方面又唔想阿b咁快出黎,因為我唔捨得阿b係我肚入面既感覺,每日有佢貼身既陪伴,就算一個人出街,都唔覺得悶,佢可以靜靜咁陪我食飯,行街,睇電視...真係好享受!!!

無論如何,而家既話事權都係阿b身上,究竟幾時出黎見我地,都係由佢決定,我同mo嗲地只有一個希望,就係阿b健健康康,順順利利咁來臨momosa溫暖之家!!!我,mo嗲地,冬豬同三個靚靚家姐都期待您既來臨!!!!!!